დღეს, საქართველოს რეგიონული განვითარებისა და ინფრასტრუქტურის მინისტრი "საქართველოს უნივერსიტეტის" მაგისტრატურის სტუდენტებს შეხვდა. რამაზ ნიკოლაიშვილმა მაგისტრანტებს სამინისტროს მიერ განხორციელებული მნიშვნელოვანი პროექტები გააცნო და სამომავლო გეგმებზე ესაუბრა. აღსანიშნავია, რომ მინისტრთან შეხვედრისა და ინფრასტრუქტურული პროექტების გაცნობის სურვილი, სოციალური ქსელის "ფეის ბუქის" საშუალებით, თავად სტუდენტებმა გამოთქვეს. მათ რამაზ ნიკოლაიშვილის "ფეის ბუქის" გვერდზე გამოაქვეყნეს წერილი, რომელშიც მინისტრს შეხვედრას სთხოვდნენ. საქართველოს რეგიონული განვითარებისა და ინფრასტრუქტურის სამინისტრო "საქართველოს უნივერსიტეტთან" უკვე მეორე წელია მემორანდუმის საფუძველზე წარმატებით თანამშრომლობს. აღნიშნული თანამშრომლობის ფრაგლებში რეგიონული განვითარებისა ინფრასტრუქტურის სამინისტროში "საქართველოს უნივერსისტეტის" არაერთმა სტუდენტმა გაიარა სტაჟირება და დასაქმდა. მაგისტრანტების განსაკუთრებული დაინტერესება საქართველოს რეგიონებში სამომავლოდ დაგეგმილმა და მიმდინარე მასშტაბურმა პროექტებმა გამოიწვია, მათ შორის: "კახეთის რეგიონული განვითარების პროექტმა", პროექტმა "ლაზიკამ", ანაკლიაში მიმდინარე ინფრასტრუქტურულმა პროექტებმა და ბათუმის ტექნოლოგიურმა უნივერსიტეტმა და ა.შ.

  12-13 მაისს საქართველოს სხვადასხვა რეგიონში ძლიერი წვიმის შედეგად მოვარდნილმა ღვარცოფმა სერიოზულად დააზიანა ინფრასტრუქტურა და დააზარალა ადგილობრივი მოსახლეობა. სტიქიამ განსაკუთრებით კახეთისა და მცხეთა-მთიანეთის რეგიონები აზარალა. მნიშვნელოვნად დაზიანდა გზები და ხიდები, დაიტბორა საცხოვრებელი სახლების პირველი სართულები და სასოფლო-სამეურნეო ნაკვეთები. დღეს, საქართველოს პრემიერ-მინისტრმა ნიკა გილაურმა მთავრობის საგანგებო სხდომა მოიწვია, რომელზეც მინისტრებისგან რეგიონებში არსებული სიტუაციის შესახებ ინფორმაცია მოისმინა. როგორც სხდომაზე აღინიშნა სტიქიის შედეგად მიყენებულმა ზარალმა 5 მლნ ლარი შეადგინა. გადაწყდა, რომ აღნიშნული თანხა  დაუყოვნებლივ გამოიყოფა ბიუჯეტიდან რეგიონებში სტიქიის  შედეგების ლიკვიდაციისა და ინფრასტრუქტურის აღდგენითი სამუშაოების ჩასატარებლად.  

დღეს, საქართველოს რეგიონული განვითარებისა და ინფრასტრუქტურის მინისტრი რამაზ ნიკოლაიშვილი, პრეზიდენტის რწმუნებულთან კახეთის რეგიონში გიორგი ღვინიაშვილთან ერთად, სტიქიიის შედეგად დაზარალებულ ქალაქ გურჯაანში იმყოფებოდა. მინისტრი დაზარალებულ მოსახლეობას შეხვდა და დაზიანებული ინფრასტრუქტურა დაათვალიერა. ძლიერი წვიმის შედეგად მოვარდნილმა ღვარცოფმა განსაკუთრებით კახეთის რეგიონის ორი მუნიციპალიტეტი გურჯაანი და ლაგოდეხი დააზარალა. მნიშვნელოვნად დაზიანდა დასახლებულ პუნქტებში არსებული გზები, ხიდები და სასოფლო-სამეურნეო ნაკვეთები. დაიტბორა საცხოვრებელი სახლების პირველი სართულები, შეიზღუდა სასმელი წყლისა და ელექტრო ენერგიის მიწოდება. რეგიონული განვითარებისა და ინფრასტრუქტურის სამინისტროს შესაბამისი სამსახურები სტიქიისგან მიყენებული ზარალის აღმოსაფხვრელად 24 საათიან რეჟიმში მუშაოებენ. ამ დროისათვის ელექტროენერგიისა და სასმელი წყლის მიწოდება აღდგენილია.დღესვე, რამაზ ნიკოლაიშვილმა გურჯაანში საგანგებო თათბირიც გამართა, რომელზეც გამგებლებისგან მუნიციპალიტეტებში არსებული მდგომარეობის შესახებ ინფორმაცია მოისმინა. სტიქიის ადგილზე მობილიზებულია რეგიონული განვითარებისა და ინფრასტრუქტურის სამინისტროს და მუნიციპალიტეტის სპეციალური კომისია, რომელიც დაადგენს ზარალის ოდენობას და შეიმუშავებს გზებს სტიქიის შედეგების აღმოსაფხვრელად და მოსახლეობისათვის მოსალოდნელი საფრთხის ასაცილებლად.